I mihia rawatia a Shane e te heamana o Whakaata Māori, e Jamie Tuuta mōna i whakapau kaha ahakoa te huringa o te tai me te tikoki o te waka i ngā tau.

‍

E ai ki a Jamie,"Tata ki te waru tau a Shane e hautū ana i a Whakaata Māori, ngangahu mai ana tana aro ki tō tātou iwi, tana pukumahi hoki mō te kaupapa te take,”

‍

“Ā mohoa noa nei, kua ora noa atu te āhuatanga ahumoni ki tēnei whakahaere arapāho taketake, he matihiko-tuatahi te aronga. Ko te tapeke o ngā apataki Māori kua piki ki te pae o runga, ā, kua piki ake tō mātou mōhio ki te pānga o ā mātou mahi ki te whakarauoratanga o te reo me ngā tikanga Māori i roto i ngā whānau me ngā hapori.”

‍

“Nā te tukutahi o te hoe te waka i koke ai. Nā rau ringa i whakatere te waka tōpāparu i a rātou e pāho tonu ana hei whakanui i ngā kaimātakitaki, me te kaupapa.”

‍

Ko tā Jamie, e mārakerake ana te ara ki te huapae o te rangi, ā, he paeroa nui whakaharahara kei mua i te aroaro.

‍

“I roto i te tahua pūtea 2026, i whakaae te Kāwanatanga ki te tuku i te $8 miriona mō ngā tau e toru ki te whakawhanake i te taha matihiko, ā, kua tīmata kē hoki ngā mahi ki te whakaniko i te kaupeka e kainamu mai nei.”

‍

‘Mō te Kaihautū hou, ka taka ki a ia tētahi tūāpapa whaimana, ka riro hoki i a ia te āheinga ki te mahi tahi ki te poari me tō mātou tira ki te waihanga i te āpōpō.”

‍

Ko tā Shane, ko te hautū i a Whakaata Māori te tūranga nui taioreore o tōna ao whakahaere pakihi.

‍

Hei ko tāna anō,“Ko ngā mea katoa kua oti i a mātou te mahi, e hāngai tika ana ki taua kaupapa tonu: kia mauriora te reo.”

‍

I tukuna mai e Tū Ātea tētahi ara whakahirahira ki te whakamahi i ngā pūkenga kei a au ki te whakawhanake i tētahi atu anō kaupapa Māori ā-motu.

‍

E rerekē ana ngā haepapa ki a Whakaata Māori; tēnā i ērā ki a Tū Ātea, engari e rua e rua i ahu mai i te tohe nui a te Māori kia ora ā tātou taonga me tō tātou tino rangatiratanga ā haere nei te wā. He peka rerekē i te rākau kotahi, e whāinumia ana e ōna anō pakiaka: koia rā ko tō tātou whakapapa, me ngā manako nui ki te mana motuhaheke me te tino rangatiratanga.

‍

“E rerekē ana te peka, engari ko aua pakiaka tonu.” E ai ki a Shane, he mahi nui anō hei mahi i mua i tana hekenga i te mutunga tau. “E ū tonu ana au ki te tūranga Kaihautū, ka mutu, e aro nui ana ki te hāpai i tō tātou iwi, ā tātou apataki, me tā tātou kaupapa.”

‍

Ka tīmata te tukanga kimi kaimahi a te Poari ināia tonu nei.

‍

“Ahakoa huri ai te kaihautū, ka tere tonu te waka,” koirā te kī a Jamie.

‍

KA MUTU

‍

Erana Karauti

Tumu Whakapā

Wāea: 022 470 2402

Īmēra: Erana.karauti@whakaatamaori.co.nz

‍

KUPU APITI:

I tīmata a Shane Taurima i Whakaata Māori hei Kaihautū tuarua i te Hepetema 2018, ā, i tohua ki te tūranga hei Kaihautū taupoto i te Tīhema 2018. I tohua motuhaketia hei Kaihautū i te Mei 2019 kātahi ka tohua anō ki te tūranga mō te wāhanga e rima tau te roa, ko te tikanga kē, hei te 2029 mutu ai.

Ko te Māori te kaipupuri i a Tū Ātea, arā, ko te rōpū hangarau, whitimamao, tūāhanga i takea mai i te ao o te hunga tiaki rawa Māori, me ngā mahi nui kua oti i a te Māori te mahi, hei kanohi kitea, hei pou i te ao ōhanga matihiko.

‍

KA MUTU

‍

Mō MĀORI+

He urunga matihiko a MĀORI+ ki te ao Māori, e tūhono nei i te whānau ki ngā pakiwaitara kounga, ki ngā kawepūrongo, ki te kapa haka, me ngā momo whakaaturanga katoa i ngā momo hangarau-pāho katoa. He utukore te pāho tikinoa ki maoriplus.co.nz.

Tikiake i te MĀORI+ i te toa hoko taupānga.

‍

Mō Whakaata Māori

Ko Whakaata Māori te whakahaere arapāho taketake o Aotearoa. He mea koke te waka reo Māori, te waka pakiwaitara Māori hoki, e whakakaha ana i te tuakiritanga, i te hononga tāngaengae, me te ngākau titikaha ki te kawe i tō tātou ahurea ki te nukuroa o te whenua. Mō ngā whakamahuki, hono atu ki whakaatamaori.co.nz.