I tēnei rā, i puta i a Whakaata Māori te Pūrongo Uara Pāpori 2025, he mea whakaū i te hirahira me te horapa o ana hua whakarauora i te reo Māori me ngā tikanga Māori.  

E ai ki te pūrongo motuhake, koni atu i te $114 miriona te nui o te uara pāpori i hua ake i te tau 2023-2024 – he nui ake i te rearua o tā Whakaata Māori tahua whakahaere.

He mea whakaatu te pūrongo nei i ngā hua ahurea me ngā hua pāpori kua puta i te arapāho kaupapa Māori - arā, ko te pikinga o te rere o te reo Māori ki ngā kāinga, te kaha ake o te tuakiri me te ngākau titikaha, tae atu ki te horapa o tā te motu whānui o Aotearoa mārama ki te ao Māori.

"Kei te whakaū te pūrongo nei i tā te nuinga o tātou e mōhio kē ana i ō tātou ake wheako – arā, he mea panoni te arapāho kaupapa Māori i te iho o Aotearoa, kaua ko ngā ao o ngāi Māori anake,” tā Shane Taurima, te Kaihautū o Whakaata Māori.

“Ko tā Whakaata Māori he tautoko kia taunoa te rere o te reo, kia kaha ake te tuakiri o te whānau, kia whaihua tūturu ngā whakatipuranga”

He mea tono te pūrongo i runga i te auroa o tā Whakaata Māori ū ki te ine pāpātanga. I arotakehia motuhaketia Te Pūrongo Uara Pāpori 2025, e te umanga Social Ventures Australia (SVA) Consulting.

Kei te aroākapa te umanga o SVA i ngā mahi ine pāpātanga pāpori puta noa i Aotearoa me Ahitereiria, mā te mahi tahi ki ngā hapori, te ohaoha, me te rāngai tūmatanui.

“Mai rā anō, kua nui ake tā mātou kaupapa i te pāpāho,” tā te Kaihautū o Whakaata Māori, tā Shane Taurima.

“Ko tā te pūrongo nei, he āpiti whika ki tā mātou e kite nei i ia rā - kei te kaha ake te kōrero Māori a ngā tamariki, kei te tupu te māia me te ngākau titikaha o ngā whānau, ā, e rongo ana ā mātou kaihoe i te kaha ki te ārahi.  He taunakitanga nui e whakaatu ana i te whaihua o te haumitanga ki te arapāho kaupapa Māori hei painga mā ngāi tūmatanui.

‍

Ngā Kitenga Matua  

• $114.2 miriona te hua pāpori i puta

• 2.5M+ ngā kaimātakitaki pouaka whakaata i ia tau | 4.8M+ ngā kiritaki matihiko | 172M+ ngā pānga pae pāhopori

• 78% o ngā apataki Māori e rongo ana i te kaha ake o te hononga ki tō rātou tuakiri

• 69% o ngā mātua e kī ana kua nui ake tā ā rātou tamariki kōrero Māori, whakatinana hoki i ngā tikanga Māori ki te kāinga

• 66% o ngāi tauiwi e kī ana he nui ake tō rātou mārama ki te ao Māori

• 82% o te hunga ako e kī ana kua pakari ake tō rātou reo

• 89% o ngā kaihoe (kaimahi o Whakaata Māori) rongo i te kaha ki te tautoko i te whakarauora reo

‍

Kei te hāngai pū ngā kitenga ki ngā whāinga o TeWhare o te Reo Mauriora, otirā, ki ngā wawata o te Maihi Māori me te MaihiKarauna, kia toitū te ora o ngā whakatupuranga, kia mauriora te reo, kia kahate ahurea.

‍

Tikiake i te pūrongo: whakaatamaori.co.nz/socialvalue 

Tono Pāpāho: 

Erana Karauti 

Tumuwhakapā 

Whakaata Māori 

Īmēra: erana.karauti@whakaatamaori.co.nz 

Wāea: 022-4702-402