Ki tā te Kaihautū o Whakaata Māori, ki a Shane Taurima, ko tēnei momo rautaki panoni i te 20 o Hune, ehara i te panoni ingoa noa iho.

“He kokenga whakamua tēnei i roto i te whanaketanga matihiko, e noho ai tō tātou iwi, me ā tātou kōrero ki te pūtahi o te kaupapa”.

“Mā te whakakotahi i ā mātou paepāho matihiko ki raro i te maru kotahi o MĀORI+, ka kaha ake te tū a Whakaata Māori hei whakaata i tō tātou tuakiri, i te ahunga whakamua, me te āhua o te tūhono ki ngā apataki o te kāinga, otirā, o ērā huri noa i te ao.”

Ka panoni ngā paepāhopori katoa o Whakaata Māori ki te ingoa hou, arā, ki a MĀORI+, (hāunga rā ia te pae LinkedIN), kia kotahi, kia māmā hoki te tūhura kia noho mātāmua mai ko ngā pae matihiko mā ngā apataki.

Ko Whakaata Māori tonu te Pou – koia rā te tūāpapa o te auahatanga hei taituarā mō MĀORI+ me Te Ao Māori News. Kei te ū tonu mātou ki te whakarauora i te reo Māori me ngā tikanga Māori mā ngā reanga whakatupu e heke mai nei.

I a tātou ka whakanui i a Matariki, ka anga whakamua te titiro ki te tau hou, ko tēnei whanaketanga, he whakaaata i tā mātou ū – kia mauriora te reo.

‍HE ARONGA HOU MŌ MATARIKI: KA REWA TE HŌTAKA POUAKA WHAKAATA HOU Ā TE 20 o HUNE

Mai i te 20 o Hune, te tīmatanga o te tau hou Māori, ka whakahāngaihia e Whakaata Māori tana rārangi hōtaka kia pai ake te whakaata i te taiao, otirā, i te maramataka Māori – kia titia ngā kaupeka o te tau, me ngā aria tuku iho ki ngā mahi rauhī, raupapa hoki i ngā huapāho.

‍He aha te hōtaka hou?

Wā Tamariki:

6:30–8:30am – He huapāho hou mā ngā tamariki, ko Mahi Tika Ana!, ko Binnabannas, ko Tamariki Haka, ko Fly My Pepeha, ko Tākaro Tribe, Tamaiti Tū S3, otirā, ko Avatar: The Last Airbender anō hoki.

‍Ko te Reo Māori te Pou Tokomanawa:

3–6pm i ia rā – He wā Rumaki Reo hou, ko ngā huapāho mā te hunga tamariki, mā te hunga ako i te reo, otirā, mā ngā whānau.

‍Ngā Kiriata Whānau:

Kua whakamoea ngā kiriata o te Wenerei.  Hei te 7.30pm o te Paraire me te Hatarei ngā kiriata mā ngā whānau!

‍Hākinakina Hatarei:

He pāho i ngā Hākinakina i te ahiahi o te Hatarei

‍KA MUTU

‍MŌ MĀORI+: Ko MĀORI+ te kuaha matihiko ki te ao Māori – he taupānga pāho tikinoa utukore e whakakotahi nei i ngā pūrākau Māori, i te reo, i te kawepūrongo, i te haka me te ngahau.  He mea waihanga mā ngā whānau, he māmā te toro ki ngā ngā taputapu huhua, ā, e rite tonu ana te tāpiri huapāho hou.  Tikiake i te taupānga i Google Play i te Apple store rānei.  Mātakitaki mai i www.maoriplus.co.nz

‍Mō Whakaata Māori:  Ko Whakaata Māori te whare pāpāho taketake Aotearoa e ū nei ki te whakarauora me te whakakaha i te reo Māori, i te ahurea, me te tuakiri mā te kōrero pūrākau.  He mea ārahi e te wawata nui kia mauriora te reo – kia māhorahora te reo.