Ko te aho o te reo, ko te whenu pōti, hei tāniko anamata!

Ka kōkirihia e Whakaata Māori tana pāhotanga Kōwhiringa Pōti Whānui ki ngā hapori o te motu, mā te pāho mataora i ngā rohe pōti Māori e whitu, te kohikohi raraunga me te rangahau hāngai pū ki ngā rohe pōti, ngā huapāho aro ki te hunga rangatahi, ka whānui hoki te pāho i te pō o te pōtitanga.

I raro mai i te karangatanga Whakatau 2026, ka waihangahia e Whakaata Māori tētehi taiao kaupapa Māori e whakaponotia ana kia tika tonu te rongo a ngā whānau i ngā kaitono, me tā rātou āta tirotiro i ngā kōwhiringa kei mua i ō rātou aroaro, kia whakatauria tō rātou anamata i runga i te āta mōhio.

Ko tā te Kaiurungi Pāpāho o Whakaata Māori, tā Maria Barlow, e whakaata ana a Whakatau 2026 i te haepapa o te whakahaere kia noho mai ngā reo, ngā whakaarotau me ngā wawata Māori ki te pokapū o tā te motu whiriwhiringa kōrero tōrangapū.

"Ko te kaupapa o Whakatau 2026 he whakaū i tā ngā whānau āhei ki te rongo tika i ērā e whai nei ki te tū hei māngai mō rātou, kia mārama ki tā rātou tū, kia tatū ngā whakatau mō te anamata i runga i te āta mōhio," tā Maria Barlow.

"Mā te kōkiri i ngā taukumekume ki ngā rohe pōti Māori, ka mauria te whiriwhiringa kōrero tōrangapū kia tata ki ngā hapori ka whakaaweawehia e ngā whakataunga ka puta i muri mai i tēnei pōtitanga.

"Kei te pīrangi hoki mātou kia kite ngā rangatahi i a rātou anō i tēnei pāhotanga, kia rongo hoki rātou i te awenga kei a rātou. Ko ō rātou reo, wheako, wawata hoki he mea nui, waihoki, kei a rātou te mana ki te ahuahu i ngā āhuatanga ka whai ake."

Ko tā Whakatau 2026 he whakakotahi i ētehi o ngā mātanga haurapa o te ao Māori, ngā kaipāho me te hunga whakapuaki whakaaro, arā, ko te kaiwhakataki o Te Ao with Moana, ko Moana Maniapoto, ko ngā kaikawepūrongo mātāmua - ko Māni Dunlop rāua ko Whatitiri Te Wake, ko te toa haurapa kōrero tōrangapū, ko Maiki Sherman, me te kaipāho rongonui, ko Julian Wilcox.

E hoki ana a Maiki Sherman ki tōna ūkaipō pāpāho, ki a Whakaata Māori, ā, ka whai wāhi atu ki te whānuitanga o ngā pāhotanga Whakatau 2026, ka tōia mai te hōhonutanga o ōna wheako haurapa kōrero tōrangapū. Ka mahi tahi a Maiki Sherman rāua ko Julian Wilcox hei takawaenga i ngā taukumekume mataora i ngā rohe pōti Māori.

Ka hāngai tēnā me tēnā taukumekume ki ngā raraunga inekounga motuhake me ngā rangahau hāngai pū ki ngā rohe. Ko tēnei aronga e arahina ana e ngā taunakitanga, he mea āwhina ki te whakaū, ka uia ngā kaitono kia hāngai ā rātou whakautu ki ngā wawata, ngā whakaarotau me ngā wero kua tautuhia e ngā hapori e whai nei rātou ki te tū hei māngai mō rātou.

Ko ngā rangatahi Māori tētehi atu aronga matua o Whakatau 2026. E ai ki te Kaitiaki Take Kōwhiri ko tōna 200,000 ngā tāngata o Aotearoa e 18-24 tau te pakeke kāore anō kia rēhita ki te pōti, e miramira ana i te hiranga o te whakarite kaupapa tōrangapū e tūhono ana, waihoki e hāngai ana ki ngā taiohi i runga i te āhuareka.

Ko Straight Up! te terenga ka pāho tuatahi ki ngā pae pāhopori, he mea tō i ngā kaiārahi tōrangapū māhuri tōtara tokowhitu ki te kōrero hāngai ki ngā rangatahi Māori. He mea whakataki e te kiri hangareka, e Janaye Henry, ka aro te terenga ki ngā horopaki tūturu, me ngā wero matawhawhati kia tere ai te whakatau hei hura i ngā uara, ngā whakaarotau, me ngā ara hautū o ērā e whai nei ki te ahuahu i te anamata o Aotearoa.

Ka tautoko a Te Ao Māori News i te whānuitanga o ngā kaupapa a Whakatau 2026 mā te tuku pūrongo i ia rā, te pāho i ngā rongo inamata o te motu, me te whakaū i te noho mātāmua o ngā tirohanga Māori i roto i ngā pāhotanga kōwhiringa pōti i te roanga o te kōkiritanga.

TE RĀRANGI HŌTAKA O WHAKATAU 2026

He Aha Te Whakatau

Ko Māni Dunlop rāua ko Whatitiri Te Wake ngā kaiwhakataki i te hōtaka pāho mataora i ia rua wiki hei hura i ngā kōrero tōrangapū kei ngā upoko kōrero pāpāho Māori. He mea whakaputa nā Rukuwai Tipene-Allen, ko tā tēnei hōtaka he whakaatu i te whānuitanga o te tirohanga, te horopaki me te hōhonutanga o ngā whakatau me ngā whanaketanga e whakaahua ana i a Aotearoa.

Mātaki ināianei: Te Ao Māori News, MĀORI+ me Whakaata Māori.

Pāhotanga Motuhake i Mua i te Pōtitanga

He hokinga mahara, ka āta wetewetehia tēnei kaupeka Kāwanatanga, āna whakataunga matua me ngā pāpātanga ki ngā hapori Māori, otirā ki Aotearoa.

Mātakihia ā te 22 o Hepetema: Whakaata Māori, MĀORI+ me Te Ao Māori News.

Straight Up!

Ko Straight Up! te terenga ka pāho tuatahi ki ngā pae pāhopori, he mea tō i ngā kaiārahi tōrangapū māhuri tōtara tokowhitu ki te kōrero hāngai ki ngā rangatahi Māori. He mea whakataki e te kiri hangareka, e Janaye Henry, ka aro te terenga ki ngā horopaki tūturu, me ngā wero matawhawhati kia tere ai te whakatau hei hura i ngā uara, ngā whakaarotau, me ngā ara hautū o ērā e whai nei ki te ahuahu i te anamata o Aotearoa.

Mai i te 14 o Hepetema: Te Ao Māori News, MĀORI+, Paeāhua me Pukamata

Ngā Tautohetohe Rohe Pōti Māori - Whakatau 2026

E mahi ngātahi ana ki The Hui, ka pāho mataora i ngā rohe pōti Māori e whitu. Ko Jilian Wilcox rāua ko Maiki Sherman ngā takawaenga, he mea kōkiri ngā

tautohetohe i runga i ngā rangahau motuhake e hāngai pū ana ki ngā rohe pōti, otirā, he mea arotahi ki ngā whakaarotau o ngā hapori e whai nei ngā kaitono ki te tū hei māngai mō rātou.

Mai i te 29 o Hepetema pāho mataora ai: Whakaata Māori, MĀORI+, Te Ao Māori News me ngā pae pāhopori.

Tā MĀORI+ Tautohetohe Kaiārahi Māhuri Tōtara

Ka mauria mai e ngā rangatahi Māori ō rātou wawata, wheako me ngā whakaarotau ki ngā take me ngā whakataunga e uaratia ana e ngā kaipōti Māori rangatahi, ā, ka rangona tā te reanga hou o ngā kaiārahi tōrangapū urupare atu.

Mātakihia ā te 27 o Oketopa, ā te 7.00pm: MĀORI+, TikTok me ētehi atu pae matihiko.

Te Taukumekume Kaiārahi Māori me Te Ao with Moana

Ka matapakihia e ngā kaiārahi pāti me ngā kaitono Māori e tū ana ki ngā rohe pōti whānui ngā wawata me ngā whakaarotau kei te horanuku tōrangapū whānui o te motu. Ka whai ake te pāhotanga mataora o He Aha Te Whakatau hei tātari i ngā kōrero.

Mātakihia ā te 28 o Oketopa, ā te 7pm: Whakaata Māori, MĀORI+, Te Ao Māori News me ngā pae pāhopori.

Pāhotanga Pōtitanga Motuhake – Whakatau 2026

Mā te tira tōrangapū o Whakatau 2026 e pāho mataora ngā kaupapa whānui i te huranga o ngā tatūnga pōti, ka tautokohia e ngā kaikawepūrongo kei ngā rohe o te motu. Ka kitea ngā hua mataora, ngā urupare a ngā kaitono, ā, ka āpitihia ngā kōrero me ngā tātaringa o ngā hua ka pā pea ki ngā whānau, ngā hapū, ngā iwi, otirā, ki Aotearoa.

Mai i te 7.00pm pāho mataora ai ā te Hatarei te 7 o Noema

Whakatau 2026 Pāhotanga Takamuri Motuhake

Ngā miramira o te pō pōti, ngā uiuinga ki ngā kaitono angitu me ngā tātaringa tohunga e tirotiro ana i te pānga o ngā tatūnga ki ngā hapori Māori me te ahunga o Aotearoa ki te anamata.

Mātakihia ā te 5.00pm o te Rātapu 8 o Noema: Whakaata Māori, MĀORI+, Te Ao Māori News me ngā pae pāhopoti.

KA MUTU

Mō MĀORI+

Ko MĀORI+ te kūaha matihiko ki te ao Māori - he pae pāho utukore e whakakotahi ana i ngā tino pūrākau Māori, te reo Māori, ngā rongo kōrero, te kapa haka me ngā kaupapa whakangahau. He mea waihanga mā ngā whānau, he mea māmā te hautū i a MĀORI+ ki ngā pūrere, ā, ka whakahoungia ki ngā huapāho hou. Tīkina ake a MĀORI+ i Google Play , i te Apple App Store, mātakihia rānei ki maoriplus.co.nz.

Mō Whakaata Māori

Ko Whakaata Māori te whakahaere pāpāho taketake o Aotearoa, e ū ana ki te whakarauora me te whakakaha i te reo Māori, ngā tikanga Māori me te tuakiri Māori mā te kōrero pūrākau. He mea ārahi e tō mātou whakakitenga Kia mauriora te reo – ko te anamata e māhorahora ai te rere o te reo Māori. Ko tā Whakaata Māori he waihanga i te taiao e tōnui ai te reo me ngā taonga tuku iho. He mea whakatū i te tau 2004, ko Whakaata Māori te kaipāho i ētehi o ngā tino huapāho o Aotearoa, he tūhono ana i ngā apataki ki ngā kōrero whakanui, whakatairanga hoki i te reo Māori me te ahurea Māori. E tauhokohoko ana a Māori Television i raro i tōna ingoa Māori, i a Whakaata Māori kia pai ake te whakaata i tana kawenga whakarauora i te reo Māori, whakakaha i te ahurea Māori, me te whakarato i ngā pūrākau Māori ki ngā paepāho maha. Whakaata – he mira, he whakaaata, he whakaatu.

whakaatamaori.co.nz

‍